Hún Kolbrún Soffía á afmæli í dag

 Hún á afmæli í dag hún Kolbrún Soffía Þórsdóttir og er 3 ára. Myndirnar eru allar frá því í sumar nema eins árs afmælismyndin þar sem hún er með kórónuna. Hún er mikið fyrir eldamennsku eins og sést á þessari fyrstu mynd.  Kolbrún Soffía býr nú í Danmörku.

 

 Þetta er dugleg stelpa og þæg sérstaklega ef hún fær ís eins og sést hér á myndinni að ofan,  þarna er hún með Þór pabba sínum.

 

 

 

 

Á þessari mynd er Harpa mamma hennar og Kolbrún amma hennar og nafna.

TIL HAMINGJU MEÐ AFMÆLIÐ KOLBRÚN SOFFÍA MÍN

Óhapp við höfnina fyrir margt löngu

Þarna slitnaði sennilega vír í krananum þannig að kranabóman féll ofan á nokkrar trillur. Myndin er tekin austan við Fiskiðjuna hf í Eyjum þar sem geymdar voru trillur hér áður fyr. Á þessu svæði er nú stórt mjölgeymsluhús.

Þarna er verið að hífa bómuna ofan af trillunum sem eru margar hverjar mikið skemmdar ef ekki ónýtar.

Þeir eru úr miðbænum þessir peyjar sem eru þarna á myndinni, sá í gráu peysuni er Páll Magnússon núverandi útvarpsstjóri,við hliðina á honum í brúnum jakka heitir Pétur Friðgeirsson sá sem stendur við lyftaran er Siggi á Háeyri og peyjinn sen er fremst á myndinni er Jón Bernódusson frá Borgarhól.

Vörubilinn átti að öllum líkindum held ég Halli Togga.

Myndina tók vinur minn Ómar Kristmannsson.

Ótrúlegt ef þetta er rétt

 

Markvisst og meðvitað er unnið að því hjá lögregluembættinu á höfuðborgarsvæðinu að fegra stöðu mála í nýlegri ársskýrslu. Snorri Magnússon formaður Landssambands lögreglumanna segir að borið hafi á því að skýrslum lögreglumanna sé breytt til að draga úr alvarleika mála sem þeir sinna.

Þetta er ótúleg frétt ef rétt er, ég bíð nú eftir viðbrögðum lögreglustjóra eða æðstu embættismanna við þessari frétt. Ef þetta er rétt, hvað er þá að marka aðrar opinberar skýrslur sem út koma um hin ýmsu mál á hverju ári ??? . Svo er talað um að það sé lítil eða engin spilling í okkar góða landi Íslandi.

 

Ég segi nú eins og maðurinn. ER þetta ekki lögreglumál ?????

Viðbót við færslu: Stefán Eiríksson, lögreglustjóri höfuðborgarsvæðisins, segir ekkert hæft í ásökununum, það séu lögreglumennirnir einir sem komi nálægt skráningunum. „Þetta er algjörlega úr lausi lofti gripið, það er enginn að breyta neinum skráningum eftir á og engin fyrirmæli sem við höfum gefið um að slíkt sér gert."

Annar hvor segir ekki satt, þess vegna verður að komast til botns í þessu máli og það strax. Svona uppákoma er mjög slæm fyrir lögregluna og vatn á millu þeirra sem hafa verið hvað harðastir í að gagrýna  lögregluna.

 

Á efri myndinni sem er gömul mynd af lögreglumönnum í Vestmannaeyjum eru t.f.v: Sveinn, Ragnar, Pétur, Stefán yfirlögregluþjónn, Sigurgeir, Jóhannes og Óskar. Á neðri myndinni eru sömu menn við lögreglubílin sem nefndur var Græna Maía

Segir skýrslum lögreglu breytt

Gömul mynd

 

Ekki veit ég nákvæmlega hvenær þessi mynd er tekin eða hvar í Eyjum, en á henni eru t.f,v: Erla Sigmarsdóttir heitin, Matthías Sveinsson vélstjóri og Gísli Sigmarsson útgerðarmaður og skipstjóri.

Öryggisbúnaður Hafna hér og erlendis er misjafn

Á þessum myndum sést hvað bryggjukantar eru lágir aðeins um 10 sm og með flága sem auðveldar bílum og hjólum að fara yfir kanntinn. Á 'islenskum bryggjum er lagmarkshæð 20 sm.  þessi bryggja er er alveg ný. Bryggjustigar á þessari bryggju eru góðir en ekki búnir ljósum eins og á íslenskum bryggjum. Engann bjarghring eða annan björgunarbúnað var að sjá þarna á þessari bryggju, en þarna er fólk mikið að veiða á stöng.

 Sem  áhugamaður um öryggismál sjómanna og þar með hafna kom mér á óvart þegar ég var á ferð  í Skagen í Danmörku, hvað öryggisbúnaður í höfnum þar er öðru vísi en á Íslandi, Þar er óhemju mikið af fólki á ferð  um bryggjurnar en litið um öryggisbúnað ef skys ber að höndum. Í Íslenskum höfnum eiga vera samkvæmt reglum um öryggisbúnað hafa eftirfarandi Búnaður á ákveðnu millibili.

Krókstjaki, Bjarghringur, Björgunarnet eða Björgvinsbelti, bjölluskápur eða sími, stigar með ljósi. Þá á lýsing að vera góð og sérstaklega er tekið fram að aðgengi að þessum björgunarbúnaði á að vera góð.

Á bryggjurúnt sem við fórum um höfnina í Skagen  fannst mér þetta vera allt miklu ver búið en í íslenskum höfnum, þarna sannfærðist ég um það enn einu sinni að við Íslendingar erum að mörgu leiti miklu framar í slysavörnum við sjó og einnig um borð í íslensku skipum. Enda hefur slysum fækkað verulega á síðustu 30 til 40 árum.

Þessi bjarghringur var eini björgunarbúnaðurinn á þessari bryggju sem var með langan viðlegukannt. Dönsku bátarnir eru upp til hópa vel við haldið eins og þessi á myndinni.

Reykajvíkurhöfn er til fyrirmyndar hvað öryggisbúnað snertir, þessar myndir hér fyrir neðan  tók ég af hluta af þeim öryggisbúnaði sem þar er. Annars er öryggisbúnaður hafna sem ég hef séð  kringum landið í nokkuð góðum lagi þó sumstaðar megi gera betur. Miðað við hafnir sem ég hef séð erlendis eru íslenskar hafnir upp til hópa miklu betur búnar öryggisbúnaði.

Einu sinni var

 

 

 Myndirnar eru teknar 1965 á skemmtistað í Grimsbý sem heitir eða hét Mekka, Kristján Valur Óskarson og undirritaður.

Við frændurnir vorum á þessum árum í siglingum á Leó VE 400 sem á þessari mynd er nýmálaður við svokallaða Kolabryggju  í Grimsby. Glæsilegur bátur og frábært sjóskip sem mér hefur alltaf þótt vænt um.

 

TF-LÍF nær í veikan mann

Sækir norskan sjómann

Þyrla Landhelgisgæslunnar, TF-LÍF, er á leið til Reykjavíkur með veikan sjómann af norskum togara. 

Beiðni barst frá togaranum rétt fyrir klukkan sjö. Þá var maðurinn orðinn talsvert kvalinn en talið er að hann sé með einhverskonar bólgur í munnholi sem leiði upp í höfuð.Togarinn er staddur 175 sjómílur norðvestur af Reykjavík og tekur flugið um þrjár klukkustundir fram og til baka, áætlað er að TF-LÍF lendi á Reykjavíkurflugvelli um klukkan hálfellefu. Þetta er fjórða útkall þyrlunnar á tveimur vikum þar sem sækja þarf veikan mann um borð í togara á hafi úti.

Enn nær TF-LÍF í veikan sjómann af erlendu skipi hér út í haf. þetta er ánæjuleg frétt og við getum enn einu sinni verið stollt af þessum mönnum sem stjórna þessum frábæru björgunarþyrlum. En þetta vekur mann til umhugsunar um það hvort þau lönd sem eiga sjómenn sem stunda veiðar hér við land, ættu ekki að taka þátt í rekstri þeirra björgunartækja sem margoft hafa á undanförnum árum sótt veika menn af skipum þeirra á haf út. Fyrst þjóðin  getur ekki rekið nema tvær þyrlur þá þurfum við að fá hjálp við það frá nágrannaþjóðum.

 

 

Sækir norskan sjómann

Kaffi Torg á Akureyri ( Heilræði)

Eftirfrandi er skrifað á gler umhveris kaffihúsið Kaffi Torg í Glerártorgi. 

Lifa elska óska fá,

una dreyma hljóta.

Hlæja gleðjast hrífa þrá,

heilsa faðma njóta.

Það er gott kaffið og meðlætið á Kaffi Torg á Akureyri

Ég mæli með því.

 

 

40,000 farþegar með Herjólfi

Það kom fram í fréttum í dag að Herjólfur er búinn að flytja á milli Eyja og Landeyjahafnar yfir 40,000 sagt og skrifað fjörutíuþúsund farþega frá 21 júli og til dagsins í dag, eða að jafni 300 farþega í ferð. Þetta er alveg með ólíkindum. Það virðist ekkert lát verða á ferðamannastraumnum til Eyja sem er hið besta mál.

Nú bíður maður spenntur eftir því hvernig veturinn kemur út fyrir þetta skip.

 

Stöndum öll með Slökkviliðs og sjúkraflutningamönnum

Stjórn Bandalags háskólamanna, BHM, samþykkti á fundi sínum í dag ályktun þar sem lýst var yfir stuðningi við kjarabaráttu Landssambands slökkviliðs- og sjúkraflutningamanna, LSS.

Ég tek heilshugar undir stuðningsyfirlýsingu BHM, það er hneyksli að það skuli ekki vera löngu búið að semja við þessa menn. Það er einnig  merkilegt hvað fáir hafa ályktað um stuðning við Slökkviliðs og sjúkraflutningamenn, eins og þeir eru okkur öllum mikilvægir. Við skulum hafa það í huga að það veit engin hvenær við sjálf þurfum á þeim að halda. Við getum lent í slysum hvenær sem er, eða  það komi upp eldur í húsum okkar eða á vinnustað. það er ómetanlegt að eiga þessa þrautþjálfuðu menn að þegar í neyð rekur hvort sem það er vinnuslys, bilslys, eldsvoðar eða önnur áföll sem við meigum eiga von á.  

Slökkviliðsmenn og sjúkraflutningamenn  hafa einnig verið duglegir að fara í fyrirtæki og kynna rétt viðbrögð við eldsvoðum og fyrstu hjálp. Þetta hef ég sjálfur reynt á undanförnum árum.

Við skulum því standa með þessu fólki það á það sannarlega skilið af okkar samfélagi.

BHM styður kjarabaráttu LSS