29.4.2016 | 16:37
Björgvinsbeltið heitir ekki björgunarlykkja
Mig langar að gera hér athugasemd við fréttatilkynningu frá Slysavarnarfélaginu Landsbjörg, þar sem verið er að kynna átak í að koma fyrir Björgvinsbelti á 100 stöðum víðsvegar um landið í sumar.
Þarna er stefnt að því að auka öryggi ferðamanna við sjó, vötn og ár. Þetta er hið besta mál og Björgvinsbeltið á örugglega eftir að halda áfram að bjarga fólki eins og það hefur gert síðan það koma á markað 1989.
Björgvinsbeltið er eitt af því besta sem komið hefur fram í öryggisbúnaði til að ná mönnum úr sjó það hefur margsannað gildi sitt og bjargað mörgum mannslífum við erfiðar aðstæður.
Það sem mig langar að gera athugasemd við er að í fréttatilkynningu frá slysavarnarfélaginu Landsbjörg er Björgvinsbeltið kynnt sem björgunarlykkja, þó komið hafi fram að þetta sé Björgvinsbelti. Bæði í útvarpi og blöðum hefur svo verið haldið áfram að nefna þennan björgunarbúnað björgunarlykkju og í kynningu á einum þætti í útvarpinu var talað um Landsbjargarlykkju.
Merkilegt að menn frá Slysavarnarfélaginu Landsbjörg skuli ekki vera með rétt nafn á þessum frábæra björgunarbúnaði. Ég veit að Björgvin er mjög ósáttur við að það sé verið að breyta nafninu á Björgvinsbeltinu, hann á það heldur ekki skilið að verið sé að breyta nafninu.
Það heitir Björgvinsbelti og Björgvinsbeltið skal það alltaf kallað.
Bæta við athugasemd [Innskráning]
Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.