Nótt í Paradís eftir Hafstein Stefánsson

Ljóð um

Bjarnarey eftir Hafstein Stefánsson (F. 31.mars 1921 - D. 29. ágúst 1999) 

 Um tilurð þess skrifar Hafsteinn m.a. eftirfarandi: Ég átti því láni að fagna að koma einu sinni síðla kvölds að sumarlagi ú í Bjarnarey, og varð ég svo heillaður af umhverfinu, að mér fannst sem aldingarðurinn Eden hefði alveg eins getað verið þar. Því heitir kvæðið Nótt í Paradís.

  Nótt í Paradís

Að svörtum kletti lagði lítið fley

í logni og kyrrð á björtu júlíkveldi.

Viðmótsfögur brosti Bjarnarey

böðuð litadýrð í sólareldi.

 

Hér greinir augað alla heimsins dýrð

andinn þiggur kraft í friði nætur.

Og björgin eru í döggaf Drottni skýrð,

hver döpur vera óðast huggast lætur.

 

Húsbóndinn er enn í önnum hér,

áhyggjur og syndir finnast hvergi.

Nú sé ég hvernig guð um garðinn fer

og geislafingur þreifa á dökku bergi.

 

Hið dásamlega Drottins ævintýr

dylst hér ekki vegfaranda neinum.

Ástin heit í hverju blómi býr

og börnin sofa rótt í votum hleinum.

 

Hér þylur lífið þúsund radda brag

og þíður blærinn kyssir hamraveggi.

Undurfagurt nóttin leikur lag,

er lítill hnoðri gægist fyrst úr eggi.

 

Í ljúfri bæn ég bið þér Bjarnarey

blessunar, þá akkerum ég létti.

Þegar dagar leggur lítið fley

á lífsins haf, í burt frá dökkum kletti.

 

 Hafsteinn Stefánsson

Athugasemdir

[Árni Gunnarsson, 23.7.2009 kl. 23:42]

Afar hugþekkt ljóð og rennur ljúft fram.

[Pétur Steingríms. (IP-tala skráð) 26.7.2009 kl. 11:28]

Sæll vinur.

Fallegt ljóð um drottningu Atlandshafsins

[Sigmar Þór Sveinbjörnsson, 26.7.2009 kl. 20:26]

Heilir og sælir Árni og Pétur, já Hafsteinn Stefánsson var frábær að gera  falleg kvæði, mörg af þeim fjalla um sjómennskuna og það sem henni fylgir og um Eyjarnar eins og kvæðið um Bjarnarey drottningu Atlandshafsins .

Þakka ykkur innlitið

[Hallgerður Pétursdóttir (IP-tala skráð) 26.7.2009 kl. 20:46]

Já hann föðurbróðir minn var ágætt skáld. "Hún er demantur drottins í sænum,hún er djásnið í möttlinum hans" Hending úr kvæðinu Heimaey.

[þs (IP-tala skráð) 26.7.2009 kl. 23:24]

Sæll vertu Simmi minn.. Þetta ljóð Hafsteins er mjög gott,en ég held að ef hann hefði lent í Elliðaey þá hefðum við séð góðann kveðskap.kv

[Sigmar Þór Sveinbjörnsson, 27.7.2009 kl. 17:59]

Heil og sæl frænka, já Hafsteinn var frábært skáld og skemmtilegur maður sem hafði gaman að segja sögur eins og reyndar Pétur pabbi þinn. Hann kunni mikið af sögum um skemmtilega og svolítið sérstaka menn sem hann hafði kynnst, ég fékk að heyra nokkrar þeirra þegar við hittumst einu sinni í gosinu.  Halla þú hefur fengið þessa hæfileika til að skrifa úr föðurætt, þannig að það er skemmtilegt að lesa textann þinn. Gerði Pétur aldrei vísur ?.

Kær kveðja

[Sigmar Þór Sveinbjörnsson, 27.7.2009 kl. 18:05]

Heill og sæll Þórarinn, ég held að þetta sé alveg hárrétt hjá þér að ef Hafsteinn hefði lent í Elliðaey þá hefði ljóðið orðið jafngott. Það er hlítur að vera gaman að geta sett saman slikan kveðskap.

takk fyrir innlitið.

kær kveðja