Frábær skemmtun með Álftagerðisbræðrum

Í gær fórum við hjónin á tónleika með Álftagerðisbræðrum í Hörpu.

Gestasöngvarar voru : Sigrún Hjálmtýrsdóttir- Diddú , Ragnar Bjarnason og Örn Árnason að ógleymdri hljómsveit undir stjórn Gunnars Þórðarsonar ásamt Stefáni R. Gíslasyni undirleikara.

Í fáum orðum sagt voru þetta frábærir tónleikar þar sem bæði söngvarar, hljómsveit og tónleikagestir voru í góðu stuði og skemmtu sér auðsjáanlega allir konunglega. Þarna voru sungin lög sem við könnumst vel við og engin syngur betur en Álftagerðisbræður, einnig voru þeir með lög sem við höfðum ekki heyrt áður.

Það var einnig gaman að heyra Diddú, Örn og Ragga Bjarna syngja og segja brandara á milli atriða. Það má segja að Óskar Pétursson Álftagerðisbróðir hafi með kynningu á lögunum gert þessa tónleika enn skemmtilegri með góðum bröndurum og sögum á milli laga.

Sem sagt frábærir tónleikar sem við þökkum Álftagerðisbræðrum fyrir og hlökkum til að komast á næstu tónleika sem þeir bræður halda.