Hátíð hafsins er rangnefni á Sjómannadeginum

 Þessa grein skrifaði ég fyrir ári síðan og tel það í lagi að endurtaka hana hér á blogginu mínu í von um að sjómenn hugsi sinn gang í sambandi við Sjómannadaginn.

Sjómannadagurinn í Vestmannaeyjum 1971mynd Sigurgeir Jónasson

Sjómannadagurinn er ekki hátíð hafsins. 

 Í Vestmannaeyjum er Sjómannadagurinn  einn skemmtilegasti hátíðardagur ársins og við peyjarnir sem áttum   sjómenn  sem feður sem og aðra  ættingja vorum svo sannarlega stoltir af því að tengjast þeim og þar með Sjómannadeginum. Þegar ég síðar gerði sjómennskuna að ævistarfi mínu, gerði ég mér fljótt grein fyrir því að þessi dagur er miklu meira en skemmtun  í tvo daga.

Gamlar myndir frá Sjómannadegi í Vestmannaeyjum sem Friðrik Jesson tók.

Sjómannadagurinn er órjúfanlegur hluti af stéttarbaráttu og kynningu á starfi sjómanna. Í Vestmannaeyjum má segja að allir tengist sjómönnum á einn eða annan hátt eins og víða í útgerðarbæjum landsins.  Á Sjómannadaginn kynnum við sjómannsstarfið, minnumst þeirra sem hafa látist og sérstaklega þeirra sem látist hafa í slysum á sjó, heiðrum  aldna  sjómenn og ekki hvað síst gerum við okkur glaðan dag með fjölskyldum, vinum og skipsfélögum. Sjómannadagsráð Reykjavíkur og Hafnarfjarðar  sér Sjómannadaginn öðrum augum, ekki sem  Sjómannadag  heldur sem dag hátíðar hafsins. Það er óskiljanlegt að sjómenn skuli ekki mótmæla því að Sjómannadagurinn skuli vera tekinn eignarnámi og nefndur Hátíð hafsins í Reykjavík með vitund og vilja  stærstu sjómannafélaga landsins.

Hafið hefur tekið líf margra sjómanna sem voru  ættingjar okkar, vinir og skipsfélagar. Þess má geta til fróðleiks að á árunum 1962 til 1992 árin sem undirritaður  stundaði sjó frá Vestmannaeyjum, fórust 58 sjómenn sem voru á bátum frá Eyjum, og eru þá taldir með þeir Eyjasjómenn sem fórust og stunduðu tímabundið sjó annarsstaðar á landinu á sama tíma. Þessi tala um dauðaslys á sjó er mun hærri og skiptir hundruðum ef taldir eru allir þeir sjómenn sem fórust á þessu tímabili.                                                                                         Það er eitt af markmiðum Sjómannadagsins að minnast þessara manna, og er minningarathöfn við minnisvarðann við Landakirkju ein eftirminnilegasta stund Sjómannadagsins í Vestmannaeyjum . Finnst mönnum það viðeigandi að minnast þeirra sjómanna sem farist hafa á hafi úti og margir þeirra gista hina votu gröf, á degi sem kallaður er Hátíð hafsins? Að mínu viti er þetta fráleitt og móðgandi fyrir íslenska sjómenn. Þessi gjörningur Sjómannadagsráðs er farinn að smita út frá sér og sjómenn í hugsunarleysi farnir að breyta nafni dagsins.

Í Þorlákshöfn þar sem flest snýst um sjóinn, hafa þeir á síðustu árum apað þetta eftir Reykjavíkurfélögunum og uppnefna Sjómannadaginn sinn Hafnardaga. Sjómenn gera sér ekki grein fyrir því hvað Sjómannadagurinn er sjómönnum mikilvægur hvað varðar kynningu á starfi sjómanna, hann er okkar hátíðisdagur, ekki hátíð hafsins. Í lögum um Sjómannadaginn segir m.a: Við tilhögun Sjómannadagsins skulu m.a. eftirfarandi markmið höfð að leiðarljósi:

1.        Að stuðla að því að Sjómannadagurinn skipi verðugan sess í íslensku þjóðlífi.

2.        Að efla samhug meðal sjómanna, hinna ýmsu starfsgreina sjómannastéttarinnar og stuðla að nánu samstarfi þeirra.

3.        Að heiðra minningu látinna sjómanna, þá sérstaklega þeirra sem láta líf sitt vegna slysfara í starfi.

4.        Að heiðra fyrir björgun mannslífa og farsæl félags- og sjómannsstörf.

5.        Að kynna þjóðinni áhættusöm störf sjómanna og mikilvægi starfanna í þágu þjóðfélagsins.

Eitt af lagaskyldum Sjómannadagsráðsins er líka: „Að beita sér í fræðslu og menningarmálum er sjómannastéttina varða og vinna að velferðar- og öryggismálum hennar.“                                                                                                                             Með því að uppnefna Sjómannadaginn Hátíð hafsins er ekki verið að stuðla að því að Sjómannadagurinn skipi verðugan sess í íslensku þjóðlífi, því síður eflir það samhug sjómanna eða kynnir þjóðinni áhættusöm störf þeirra og mikilvægi.                                                                                                                                 Engan starfandi sjómenn hef ég hitt sem er ánægður með þessa nafnbreytingu. Nokkrir segja þetta afleiðingu þess að sum af stéttarfélögum sjómanna hafa verið sameinuð stórum landfélögum og þar með hafa tekið völdin menn sem hafa lítinn skilning og takmarkaðan áhuga á sjómannsstarfinu. Forustumenn í stéttarfélögum sjómanna í Reykjavik hafa sagt mér  að ef Faxaflóahafnir hefðu ekki tekið þátt í kostnaði við hátíðahöld Sjómannadagsins, hefði dagurinn sennilega lagst af. Hefur stjórn Faxaflóahafna þá sett þau skilyrði til styrkja, að nafn Sjómannadagsins verði þurrkað út og breytt í Hátíð hafsins? Samþykkti Sjómannadagsráð þessa nafnbreytingu                                                                                                                        Hvað vakir fyrir þeim 34 stjórnarmönnum sjómannafélaga og stjórn Faxaflóahafna að vilja breyta nafni Sjómannadagsins? Hvers vegna má hann ekki heita sínu rétta nafni Sjómannadagur ?.. Er þetta kannski einn liðurinn enn til þess að þagga niður í sjómönnum?.Allir hugsandi sjómenn hljóta að sjá að þessi breyting á nafni Sjómannadagsins er niðurlægjandi fyrir sjómannastéttina.

Sigmar Þór Sveinbjörnsson
 Stýrimaður.

 

 

Athugasemdir

[Kristján Óskarsson (IP-tala skráð) 28.4.2013 kl. 18:04]

Heill og sæll frændi. Ég er heilshugar sammála þér. Ég held að stoltið sé búið í íslenskum sjómönnum. Eins og Íslensku þjóðinni allavega þeim sem vilja ganga í ESB.

Ég vona að þú hafir kosið rétt eins og ég, við klikkum ekki 1946 módelið. mbk. Stjáni

[Sigmar Þór Sveinbjörnsson, 29.4.2013 kl. 21:22]

Heill og sæll frændi, já alla vega finnst mér báráttuáhugan vanta í íslenska sjómenn hvað varðar að verja stöðu sína sem sjómenn, þegar þeir geta ekki einu sinni varið Sjómannadaginn fyrir áhugalausum forustumönnum. Auðvitað kaus ég rétt eins og sönnum flokkafæking sæmir Stjáni minn.

Kær kbeðja

[Valmundur Valmundsson, 30.4.2013 kl. 13:36]

Sælir gömlu sjóhundar.

Rétt hjá Simma, hátíð hafsins er móðgun við sjómenn og fjölskyldur þeirra. Það er eins og sumir vilji ekki kannast við að sjómenn séu til í þessu landi. Alveg til háborinnar skammar. Við Eyjamenn höfum ekki bognað fyrir þessari vitleysu. Höldum SJÓMANNADAGINN heilagan og minnum á störf sjómanna Íslands. Við reynum eftir fremsta megni að halda þessu á lofti en betur má ef duga skal. Nú eru að koma ungir og ferskir menn að starfinu og með nýjum mönnum koma nýjar hugmyndir. Vonandi verður það til þess að lyfta Deginum okkar á enn hærri sess en nú er.

[Valmundur Valmundsson, 30.4.2013 kl. 13:37]

Ps heyrði að Stjáni hefði kosið framsókn!!

[Sigmar Þór Sveinbjörnsson, 1.5.2013 kl. 00:05]

Heill og sæll Valmundur og þakka þér kælega fyrir þetta innlegg þitt. Já sjómenn í Vestmannaeyjum halda sínu striki og verja Sjómannadaginn. Vonandi opnast augu sjómanna  sem enn samþykkja að Sjómannadagurinn þeirra sé þurkaður út af misvitrum forustusauðum.

Kær kveðja

[Sigmar Þór Sveinbjörnsson, 1.5.2013 kl. 00:09]

Stjani upplýsir okkur örugglega hvað hann kaus, ég held samt að Stjáni frændi minn sé flokkaflækingur eins og ég og við kjósum eftir sannfæringu okkar hverju sinni. Það er sjaldnast sami flokkur

[Kristján óskarsson (IP-tala skráð) 1.5.2013 kl. 22:08]

Sæll frændi. já ég er flokka flækingur, eins og þú.

mbk. Stjáni