Togari í brælu

 Gamall togari í slæmu veðri, ekki veit ég hvaða skip þetta er né hver tók myndina.

Einn góður vinur minn sendi mér þessa mynd, þar sem mig vantaði mynd við smá verkefni sem ég er að vinna hér heima í frístundum.

Athugasemdir

[Sigurlaugur Þorsteinsson, 5.9.2012 kl. 21:47]

Sæll meistari Sigmar.

Manni þótti nóg um hér í denn á síðutoginu þegar vírarnir slöknuðu alveg niður að lunningu og þöndust svo eins og fiðlustrengir þegar átakið kom,ekki gaman að taka það við þær aðstæður eða fást við bobbingalengjunna,eins gott að vera fljótur að hoppa frá þegar hún sveiflaðist inn,eða belgurinn kom á öldunni og tættist svo út á ólaginu,horfði á vélstjóra missa putta við svoleiðis tækifæri en hann hafði gripið inn í möskva og festist svo þegar strekti á,sami vélstjóri sveif eitt sinn út á flotkúlu í bræluskít,en þá vorum við að láta það fara og lengjann var farinn og við héldum við höfuðlínuna með því að setja lærin upp að kúlum sem við skorðuðum undir lunninguni,hann lenti á síðustunnu og setti kúluna í klofið og þegar ólagið kom þá gátum við ekki haldið við höfuðlínuna og hann flaug eins og Munchausen á fallbyssukúlunni útbyrðis,en við vorum fljótir að ná honum inn og honum varð ekkert meint af,þetta var á Ásborginni RE sem var í eigu Ísbjarnarins og Reynir sem seinna eignaðist Grindvíking og strandaði Arnfirðingi II í innsiglingunni við Grindavík haustið áður en ég var með honum,var skipstjóri.

Kv Laugi

[Tryggvi Sigurdsson (IP-tala skráð) 9.9.2012 kl. 10:07]

Sæll Simmi, þetta er annað hvort Hallveig Fróðadóttir RE 203 eða Jón Þorláksson RE 204 það er erfitt að átta sig á hvor þetta er en þeir voru jú systurskip.

[oskar olafsson (IP-tala skráð) 10.9.2012 kl. 21:19]

Sæll Sigmar þetta er Jón Þorláksson í haugasjó kv. 'Oskar 'Olafss

[Valmundur Valmundsson, 17.9.2012 kl. 14:03]

Nú kemur rifrildi hjá vinunum Óskari og Tryggva!!

[Sigmar Þór Sveinbjörnsson, 18.9.2012 kl. 17:16]

Heill og sæll Laugi og takk fyrir skemmtilega frásögn af lífinu um borð í Síðutogurunum, Allat gaman að þinum athugasemdum.

Tryggvi, Óskar og Valmundur, takk fyrir ykkar innlegg, eigum við ekki að segja að þetta sé Jón Þorláksson fyrst þeir nefna hann báðir Valmundur.

Kær kveðja