Skjót viðbrögð skipti sköpum Stóri Örn fyrstur á vetfang

Skjót viðbrögð skiptu sköpum er haft eftir skipstjóra á Maggý VE en farþegabáturinn  Stóri Örn er örugglega gangmesti bátur í Vestmannaeyjum, þarna kemur í ljós hvað gott getur verið að eiga til taks þannig bát þegar mikið liggur við. Og hafa skal í huga að það þarf einnig að vera reyndir og klárir sjómenn sem stjórna svona hraðskreiðum bátum. Og Eyjamenn eiga þá eins og dæmin sanna.

SÞS

Skjót viðbrögð skiptu sköpum“

„Við vorum nýlega komnir á miðin, vorum búnir að toga í smástund, klukkutíma eða svo, þegar brunakerfið fór í gang,“ segir Gunnar Þór Friðriksson, skipstjóri á humarbátnum Maggý VE-108, en eldur kom upp í bátnum í morgun. Engan sakaði en Gunnar Þór segir rafkerfi og vélbúnað bátsins nokkuð skemmdan.

 „Við kíktum niður í vélarrúm, þar logaði eldur og sjórinn var kominn upp í mitt vélarrúmið. Við lokuðum þá fyrir öll loftinntök og kæfðum eldinn með því,“ segir Gunnar Þór.

Aðstoð barst eftir 15 mínútur

Hann segir að aðstoð hafi borist á um 15 mínútum eftir að eftir henni var leitað. Fyrsti báturinn á vettvang var ferðaþjónustubátur í Vestmannaeyjum, sem var ferðbúinn við bryggju og brá skjótt við og flutti dælur til að dæla sjó frá borði. Að auki voru björgunarsveitarmenn um borð í ferðaþjónustubátnum. „Þessu var bara bjargað á svipstundu,“ segir Gunnar Þór. „Það er alveg með ólíkindum hversu fljótt var brugðist við.“

Hann segir engan skipverja hafa slasast, enginn þeirra hafi komið nálægt eldinum. Nokkrar skemmdir hafi orðið og eldsupptök hafi verið í vélarrúminu.

„Sjór komst í rafmagnstöfluna og olli skammhlaupi og skemmdi rafkerfið og einnig urðu nokkrar skemmdir á vélbúnaði. En það er verið að meta skemmdirnar og það er ljóst að Maggý er ekki á leiðinni út á miðin næstu dagana.“

„Það skapast alltaf hætta“

Þótt vel hafi farið segir Gunnar Þór ávallt hættulegt þegar ástand á borð við þetta kemur upp úti á rúmsjó. „Manni bregður óneitanlega, það skapast alltaf hætta þegar svona óeðlilegt ástand skapast. En þessi skjótu viðbrögð skiptu algerlega sköpum.“

www.mbl.is

Athugasemdir

[Guðrún María Óskarsdóttir., 24.7.2012 kl. 00:43]

Sæll Sigmar.

Já það kann að skipta sköpum að hafa hraðskreiðan bát og sannarlega medalía í garð þeirra sem þar eiga í hlut.

kv.Guðrún María.

[Sigmar Þór Sveinbjörnsson, 24.7.2012 kl. 11:14]

Heil og sæl Guðrún María takk fyrir innlitið.

Vestmannaeyingar hafa ávalt átt góðar björgunarsveitir og búnað til björgunar, enda áhugi á þessum málum mikill í Eyjum. Vonandi helst sá áhugi um ókomin ár.

Kær kveðja