Minning um mann. Gunnar Þ. Haraldsson

Gunnar Þorbjörn Haraldsson vélstjóri.

F. 21.april 1928 D. 30. Desember 2010.

Ævistarf Gunnars Þ. Haraldssonar var sjómennska þar sem hann var lengst af vélstjóri á fiskiskipum í Vestmannaeyjum. Hann byrjaði sína sjómennsku á síldveiðum með Sighvati Bjarnasyni á Erlingi II.

Um haustið árið 1949 fór Gunnar á vélstjóranámskeið Fiskifélags Íslands sem stóð í fjóra mánuði frá október til janúarloka og lauk  þar prófi ásamt fjöldamörgum Eyjasjómönnum sem síðar urðu nafnkunnir vélstjórar á Vestmannaeyjaflotanum.

Það segir margt um Gunnar að hann var ávalt vélstjóri á eftirsóttum skipum, með farsælum aflaskipstjórum. Hann var lengi vélstjóri á Ófeigi III sem var fyrsti stálbáturinn sem smíðaður var fyrir Vestmannaeyinga og sótti Gunnar  hann til Hollands. Eigendur Ófeigs III voru Ólafur Sigurðsson Skipstjóri og Þorsteinn Sigurðsson Blátindi. Þegar þeir Ólafur og Þórsteinn keyptu nýjan bát frá þýskalandi Ófeig II. fór Gunnar með þeim út og sigldi með honum heim sem vélstjóri. Hjá þessari útgerð var Gunnar í mörg ár og var ávalt farsæll vélstjóri.

Þegar hann hætti hjá Ófeigsútgerðinni, fór hann í land og gerðist vélstjóri hjá Ísfélaginu í nokkur ár, en sjórinn togaði alltaf í hann þannig að árið 1967 fór hann afturtil sjós. Þá sem vélstjóri á Gídeon VE 7 sem var 264 tonna stálskip smíðað í Austur Þýskalandi og var þá eitt glæsilegasta skip Eyjaflotans.

Gunnar var einnig vélstjóri á Halkíon VE 205 og Gullberg VE 292 347 tonna stálskipi sem þeir Guðjón Pálsson skipstjóri, Jón Guðleifur Ólafsson og Ólafur Sigmundsson  áttu, allt voru þetta mikil aflaskip með farsælum skipstjórum og úrvalsmannskap.

Á Gullberginu VE lauk Gunnar Haraldsson vélstjóri sínum sjómannsferil  og fór í land og gerðist húsvörður í Hamarsskóla, Þar eins og í öðrum störfum sem hann tók sér fyrir hendur stóð Gunnar sig vel enda ekki við öðru að búast af öðrum eins öðlingsmanni.

Á Sjómannadaginn 1984 var Gunnar Þ. Haraldsson heiðraður fyrir vel unnin störf sem vélstjóri og  sjómaður.

Eftirlifandi eiginkona Gunnars er Jórunn Guðný Helgadóttir frá Vesturhúsum, börn þeirra eru: Helgi Benóný, Haraldur Þorsteinn, Matthildur og Nanna Björk.

Athugasemdir

[Helgi Þór Gunnarsson, 18.2.2012 kl. 23:46]

Sæll Sigmar, blessuð sé minning Gunnars Haralds, eins og við kunningjar hans kölluðum hann. Með Gunnari er genginn góður maður, vandaður í alla staði, ég var þess ánjótandi að róa með Gunnari sumarið 1982 um borð í Gullberg VE 292, það var bæði gaman og fróðlegt, svo urðum við einir af fastagestum á ESSO hér í bæ á hverjum morgni. Ég er þér sammála að eftirsóttur var hann í starfi og leik.

kær kveðja frá Eyjum.

[Sigmar Þór Sveinbjörnsson, 19.2.2012 kl. 00:05]

Heill og sæll Helgi og takk fyrir innlitið, já Gunnar var einn af þessum öðlingum sem maður leit upp til og var alltaf jafn vinalegur við okkur peyjana gegnum árin. Því miður var ég aldrei með honum á sjó en við spjölluðum stundum saman þegar færi gafst.

Ég er innilega sammála þér Helgi Þór að þarna er genginn góður og mikilsmetinn Eyjamaður og við  eigum að halda minningu hans á lofti.

Kær kveðja til þín og þinna úr Kópavogi.

[Valur Stefáns. (IP-tala skráð) 19.2.2012 kl. 13:38]

Sælir piltar.

Já hann Gunnsi Haralds var þvílíkt ljúfmenni, ég sem lítill peyji kynntist honum þegar hann var vélstjóri hjá pabba á Halkion VE-205 og fannst okkur ekkert smá gaman að fá að fara til hans niður í vél þar sem Gunnsi var og þolinmæðin í garð okkar peyjanna var óendaleg.  Blessuð sé minning hans.