Skátafélagið Faxi var með hluta af dagskrá Þjóðhátiðar hér áður fyr

Hliðið að Vatnspóstinum þar sem Skátafélagið Faxi var með skemmtun á sunnudegi  þjóðhátíðar Vestmannaeyja. Á miðri mynd er búið að hlaða upp eldivið í varðeldin

Á þjóðhátíð hér áður fyr gegndi Skátafélagi Faxi stóru hlutverki á Þjóðhátíð Vestmannaeyja, þá var á sunnudeginum kveiktur varðeldur inn við Vatnpóstinn þar sem safnast var saman kringum varðeldinn og sungið skáta og eyjalög.

Á ég sem barn góðar minningar frá þessum skemmtunum skátanna. Þarna var farið í leiki og félagar í Skátafélaginu Faxa voru stundum með leikþætti sem fólkið hafði gaman að. Mig langar að segja hér frá smá minningarbroti frá því ég var smá peyi þegar ég átti heima á Byggðarenda við Brekastig.

Þeir æskufélagar Gísli Sigmarsson, Bjarni Jónasson, Ágúst Hreggviðsson og Sveinn á Hvanneyri  voru  á sínum tíma mjög virkir í Skátafélaginu Faxa og tóku því þátt og voru sennilega allir þátttakendur í vinnu við þessar skemmtanir Skátafélagsins. 

Gísli Sigmarsson var einu sinni að æfa leikþátt sem hét Flóin, heima á Byggðarenda, og var hann eini leikarinn, leikmunir einn tómur eldspítustokkur. Leikþátt þennan átti hann að sýna á Þjóðhátíðinni, en eins og áður segir sá Skátafélagið Faxi um varðeld, fjöldasöng og skemmtiatriði á sunnudeginum.  Þegar Gísli var búinn að æfa þetta í nokkra daga fékk hann Bjarna, Gústa og  Svenna til að taka stykkið út og fékk ég 7-8 ára gamall að vera viðstaddur   generalprufuna. Ég sé Gísla enn í anda vera með tóman eldspýtustokk og ímyndaða fló í honum, sem stökk upp úr eldspítustokknum og Gísli á eftir henni um alla stofu, Bjarni, Gústi og Svenni sitjandi á gömlum dívan, og veltust um af hlátri. Ekki veit ég hvernig þetta gekk á sjálfri frumsýningunni en þarna skemmtu við okkur konunglega.

Tímarnir breytast og mennirnir með, á sínum tíma var gerð breyting á dagskrá sunnudagsins á Þjóðhátíð Vestmannaeyja og varðeldurinn færður inn á aðal skemmtisvæði Herjólfsdals, þar sem Árni Johnsen hefur stjórnað vinsælum brekkusöng.