Sigmund Eyjamaður ársins 2011

Fréttapýramídinn:

  

  

  

  

  

  

Sigmund Eyjamaður ársins 2011

- Grímur Kokkur fyrirtæki ársins, Kristín Jóhannsdóttir fyrir framlag til menningarmála, Margrét Lára Viðarsdóttir fyrir framlag til íþrótta og sjómenn og landverkafólk fyrir framlag til eflingar Vestmannaeyja

 Handhafar Fréttapýramídans fyrir árið 2011.

Sigmund Jóhannsson, teiknari og uppfinningamaður er Eyjamaður ársins 2011 að mati ritstjórnar vikublaðsins Frétta.  Afhendingin á Fréttapýramídanum, viðurkenningum blaðsins fyrir afrek síðasta árs fór fram í hádeginu en Sigmund hefur í gegnum árin verið frumkvöðull í öryggismálum sjómanna, auk þess sem hann var samviska þjóðarinnar um áratugaskeið í gegnum skopmyndir í Morgunblaðinu.

Íþróttamaður ársins 2011 að mati Frétta Margrét Lára Viðarsdóttir, knattspyrnukona í Turbina Potsdam í Þýskalandi.  Margrét Lára er í fremstu röð íslenskra knattspyrnukvenna. Leikur nú í sterkustu deild heims í kvennaknattspyrnu. Hún var kosin knattspyrnukona ársins á Íslandi 2011 en grunnur að ferlinum var lagður í Vestmannaeyjum í gegnum öflugt starf ÍBV þar sem hún lék upp alla yngri flokka og með meistaraflokki.

Fyrirtæki ársins í Vestmannaeyjum er fjölskyldufyrirtækið Grímur kokkur sem er í fremstu röð í framleiðslu á tilbúnum sjávarréttum.  Vörur fyrirtækisins fást í öllum matvörukeðjum á Íslandi, fjölmörg mötuneyti eru meðal kaupenda auk þess sem Grímur kokkur byrjaði á árinu að flytja út vörur til Færeyja og er að þreifa fyrir sér á öðrum mörkuðum erlendis.

Framlag til menningarmála í Vestmannaeyjum fyrir árið 2011 hlaut Kristín Jóhannsdóttir, menningar- og markaðsstjóri Vestmannaeyjabæjar fyrir að hafa ýtt úr vör Safnanótt.   Safnanótt er orðin fjögurra ára menningarhátíð í Vestmannaeyjum en hún er haldin fyrstu vikuna í nóvember og nær nú yfir allt Suðurland og til fleiri staða á landinu.

Framlag til bættrar stöðu Vestmannaeyja árið 2011 sjómenn og landverkafólk í Eyjum.  Árið 2011 var eitt besta ár í sögu sjávarútvegs í Vestmannaeyjum.  Fulltrúar sjómanna og landverkafólks tóku við viðurkenningum af því tilefni. 

Auk þess fengu skipstjórar og áhöfn á Herjólfi og starfsmenn Flugfélagsins Ernis blómvendi fyrir óeigingjarnt starf í samgöngumálum síðasta ár.

Athugasemdir

[Ásthildur Cesil Þórðardóttir, 10.1.2012 kl. 16:49]

Til lukku með hann, ófáar skemmtistundir hefur þessi maður veitt mér gegnum tíðina í frábærum skopmyndum sínum.