Flugfélag Íslands, flogið innanlands, veljum íslenskt.

 Þessar myndir tók ég á flugvellinum í Grímsey í Júlí 2007 þegar ég var þar að gera skyndiskoðanir á skipum þar. þarna er Fokker 50 flugvél Flugfélag Íslands á flugvellinum og mig minnir að þetta hafi verið í fyrsta skipti sem Fokker lenti þarna í farþegaflugi. Áður hafði fokker frá Landhelgisgæslu lent á Grímseyjarflugvelli. Því miður hef ég ekki nöfnin á fólkinu, nema flugstjóranum sem heitir Kolbeinn.

 

 

Flogið innanlands, veljum íslenskt.

Í starfi mínu þarf ég oft að ferðast með flugvélum á milli staða, oftast með Flugfélagi Íslands en stundum með flugfélaginu Ernir sem er gott og traust flugfélag.

Það verður að segjast eins og er að Flugfélag Íslands er í einu orði sagt frábært. Þar má nefna að flug standast í langflestum tilfellum, pöntun flugferða og innritun gengur vel, þjónusta um borð er góð og manni líður vel í flugvélum félagsins. Þá langar mig að segja frá því að stundum lendir maður á flugmönnum sem lýsa leiðinni og helstu kennileitum sem flogið er yfir, það er virkilega skemmtilegt að fá svona fræðslu um landið sem flogið er yfir. Mættu fleiri flugmenn taka þetta til eftirbreytni. 

Eitt hefur vakið athygli mína sem breytt var nú í sumar. Þannig er að í innanlandsflugi  er boðið upp á kaffi, te og vatn og svala fyrir börn að ógleymdu litlum súkkulaðibita. Í mörg ár hefur þetta verið íslenskt gott súkkulaði frá Nóa Síríus eða svokallaðar súkkulaðiskeljar.

Nú hefur verið hætt að gefa íslenskt súkkulaði og í staðinn er farþegum gefið örlítið útlent súkkulaði sem  heitir Milka. Mér finnst að Flugfélag Íslands eigi að velja íslenskt sælgæti til að gefa farþegum í flugvélum sínum og spara þar með gjaldeyri og styrkja íslenskan iðnað.                                                        

 

 

 

 

 

 

Áhöfn á Fokkernum á flugvellinum í Grímsey í júlí 2007 . Kolbeinn flugstjóri lengst til vinstri.

 

 

 

 

 

 

 Flugfélagið Ernir er með þessa Flugvél í áætlunarflugi, myndina tók ég á flugvellinum á Höfn í Hornafirði.