Einjar J. Gíslason pretikari og skipaskoðunarmaður

Einar J Gíslason var ekki bara góður og frægur pretikari hann var líka mikill áhugamaður um öryggismál sjómanna. Verðugt er að halda minningu þessara manna á lofti sem unnu hér áður fyr gott starf að öryggismálum sjómanna.

Einar í Betel eins og hann var ávalt kallaður í Vestmanneyjum var einnig sjómaður og útgerðarmaður, hann var lengi skipaskoðunarmaður þar og skoðaði einnig ásamt bróðir sinum Óskari Gíslasyni  gúmmíbjörgunarbáta sem voru á Eyjaflotanum, þeir bræður gerðu einnig út fiskiskipið Gæfu VE. Einar skrifaði á sínum tíma blaðagreinar um öryggismál, meðferð gúmmíbáta og fl. tengt öryggimálum sjómanna.

 Vestmannaeyingar hafa lengi verið í forustu hvað varðar öryggismál sjómanna og þeir hafa þurft að hafa mikið fyrir því að koma sínum sjónarmiðum og öryggisbúnaði á framfæri, má þar nefna Gúmmíbjörgunarbátana. En það voru líka mörg smærri mál og eitt af því sem þurfti að berjast fyrir var á sínum tíma styrking fangalínu Gúmmíbjörgunarbáta.

Á þessari mynd er Einar með í sitt hvorri hendi fangalínur af gúmmíbát, en hann var einn af þeim fyrstu sem vildi styrkja þessar línur vegna þess að gúmmíbjörgunarbátar vildu slitna frá bátum á neyðarstundu. Hann lét ekki sitja við orðin tóm heldur skipti þessum línum út þrátt fyrir mótmæli frá æðri stöðum. Samkvæmt reglum átti á þessum tíma línan að hafa styrkleika upp á 180 kg en var seinna eftir miklar umræður styrkt í 360 kg eða tvöfallt meiri styrkur. Í dag er styrkur þessarar línu 1000 kg. þannig að þarna var rétt að málum staðið eins og svo oft áður.

Myndin er úr gömlu Sjómannadagsblaði mig grunar að Sigurgeir Jónasson hafi tekið myndina. Myndin hér að neðan er af þeim brærum Einari og Óskari með einn gúmmíbát í skoðun.

Athugasemdir

[Sigurlaugur Þorsteinsson, 7.9.2010 kl. 17:42]

Ég man eftir Einari uppi á netaloftinu hjá afa þar sem hann var að skoða björgunarbátana og þótti mér gaman að hlusta á spjallið í körlunum,enda var gestagangur mikill hjá karli og afi kom oft við að fá sér í nefið með Einari.

Kveðja Laugi

Ps ég held að þessi mynd sé einmitt tekin á fyrr nefndu netalofti.

[Sigmar Þór Sveinbjörnsson, 7.9.2010 kl. 19:37]

Heill og sæll Sigurlaugur og takk fyrir innlitið og athugasemd. Ég held að þetta sé rétt hjá þér að myndin er takin þarna á netaloftinu. Þarna komu oft mennirnir af bátunum sem áttu gúmmíbátana. Ég man það ekki alveg, en voru þeir ekki báðir bræðurnir Einar og Óskar að skoða gúmmíbátana, mig minnir það því þetta var og er tveggja manna tak að pakka gúmmíbát.

Kær kveðja

[Sigurlaugur Þorsteinsson, 7.9.2010 kl. 22:21]

Sæll aftur félagi Sigmar.

Jú þeir voru þarna oftast bræðurnir að vinna í bátunum og það var töluverð vinna bara að koma bátunum inn og út,en þeir voru hífðir upp í gálga sem stóð út úr gaflinum á húsinu sem snéri inn í sundið á milli húsins sem Magnabúðin var í,og upp á aðra hæð og það var gert með talíu og handafli og blésu þeir mikinn þegar þyngstu bátarnir voru teknir upp,og það var ekki mikið pláss þegar búið var að blása björgunarbátinn upp á borðinu,En þetta eru góðar og skemmtilegar minnigar frá þessum tíma.

Kv Laugi

[Sigmar Þór Sveinbjörnsson, 7.9.2010 kl. 23:03]

Heill og sæll aftur Laugi og takk fyrir þessar upplýsingar. Ég talaði við vin minn Snorra Óskars og hann sagði mér að þeir hefðu unnið saman við þetta bræðurnir, þannig að ég bætti aðeins við bloggið mitt. Já minigarnar um þessa menn eru góðar og sjálfsagt að halda þeim á lofti. Alla vega finnst mér skemmtilegt að rifja upp hvaða samtímamenn voru eftirminnilegir.  

Kær kveðja

[Árni Sigurður Pétursson, 8.9.2010 kl. 20:07]

Gaman að þessum færslum

en ég verð að leiðrétta ein mistök í þessu sem að fara alveg skelfilega í taugarnar á mér

 "Samkvæmt reglum átti á þessum tíma línan að hafa styrkleika upp á 180 kg en var seinna eftir miklar umræður styrkt í 360 kg eða um helming"

þetta er ekki styrkt um helming heldur styrkleikinn tvöfaldaður.

:)

[Sigmar Þór Sveinbjörnsson, 8.9.2010 kl. 20:37]

Heill og sæll Árni Sigurður takk fyrir innlitið, þetta er rétt ábending hjá þér, auðvitað átti ég að segja að styrkleiki línunar hefði verið tvöfaldaður  þetta verður lagfært á stundinni. Gott að fá svona athugasemdir Árni. Ég er þakklátur yfir að fá svona athugasemd.

Kær kveðja