Strandveiðar eru skemmtilegar og nauðsynlegar

Eitt af því jákvæða sem ríkistjórnin hefur gert er að koma á þessum svokölluðu strandveiðum, sem hafa fært mikið líf í mörg sjávarþorp sem hafa verið steindauð í mörg ár. Í starfi mínu sem skipaskoðunarmaður ferðast ég svolítið um landið og ræði við menn sem vinna við sjávarsíðuna. Margir sem ég hef rætt við hafa sagt mér að þessi strandveiði hafi virkað eins og vítamínsprauta á þessi sjávarþorp.

 En áróðurinn á þetta kerfi strandveiða er ótrúlega mikill  m.a.  vegna þess að reglurnar um standveiðar eru kannski ekki nógu fullkomnar, það þarf örugglega að sníða marga vankanta af þessu kerfi í  framtíðinni. En vonandi verður þetta kerfi til frambúðar landsbyggðinni til framdráttar.

Á myndinni er vinur minn Högni Skaftason skipstjóri og sjómaður með boltaþorska sem hann fékk í gær fyrir austan, en hann er á strandveiðum og  rær frá Stöðvarfirði. Ekkert er skemmtilegra en að vera á sjó í góðu veðri á handfærum, enda sést það greinilega á svipnum á Högna að hann er alsæll með aflan og lífið.

kær kveðja SÞS

 

Athugasemdir

[Guðrún María Óskarsdóttir., 2.7.2010 kl. 01:01]

Sæll Sigmar.

Án efa eru strandveiðar fyrsta skrefið til betrumbóta í fiskveiðistjórn hér við land.

Raunin er sú að veður og vindar stjórna að miklu leyti þeirri sjósókn sem þarna um ræðir en maðurinn getur auðveldlega smíðað ramma utan um það að veiðar sem slíkar geti átt sér allt árið, t.d með vélarstærð báta, og heildarpotti í tonnum talið.

það kemur.

kv.Guðrún María.

[Sigmar Þór Sveinbjörnsson, 4.7.2010 kl. 22:26]

Heil og sæl Guðrún María, Ég er sammála þér að strandveiðarnar eru vonandi fyrsta skrefið í að breyta fiskveiði stjórnunarkerfinu, en því miður eru gallar á þessu kerfi sem óspart eru notaðir til að rakka það niður. Menn þurfa án efa að berjast hatramlega til að það fá að halda áfram með þetta kerfi.

kær kveðja