Minning um mann, Reynir á Tanganum

                                                                                                                                                                                  Reynir Fríman Másson  var  fæddur í Eyjum  29. janúar 1933 var sonur hjónanna Indiönu  Sturludóttir og Mas Frímanssonar, hann lést 19. júní 1979. Þótt Reynir hafði aldrei stundað sjó var hann nátengdur sjómönnum þó sérstaklega matsveinastéttinni, ég held að eldri Eyjamenn muni vel eftir honum og þá sérstaklega sjómenn.

Æskuheimili hans var Valhöll við Strandveg og starfsvettvangur hans var hinu meginn við götuna í versluninni Tanganum. Þar byrjaði hann ungur að starfa en Tanginn seldi mikið af vörum eða kost í bátana á sínum tíma og vegna starf síns var hann aldrei nefndur annað en Reynir á Tanganum.

Í minningargrein í Sjómannadagsblaði Vestmannaeyja frá 1980 segir m.a. um Reynir.: “ Hann sinnti starfi sínu af lífi og sál, og var lipur og greiðvikinn, glettinn og gamansamur og oft gustaði í kringum hann. Frá árinu 1961 gegndi hann starfi verslunarstjóra á Tanganum. Frá öndverðu hefur megnið af bátakosti  verið keypt á Tanganum  og var það lengst af starf Reynis að sjá um þann þátt. Það var aldrei töluð nein tæpitunga á Tanganum yfir kostinum og þar sögðu menn meiningu sína umbúðalaust þegar svo bar við. En ég hygg að flestir minnist samskiptanna við Tangann og Reyni með hlýju og trúlega hefðu ekki allir látið bjóða sér upp á það sem oft var hlutskipti hans að rífa sig upp úr rúminu um miðjar nætur til að afgreiða kost í bát sem var seinn fyrir. En Reynir var lipurð og hjálpsemi í blóð borin og sem verslunarmaður var hann réttur maður á réttum stað. Reynir var kvæntur Helgu Tómasdóttir  og áttu þau fjögur börn,, Þau hjón bjuggu á Birkihlíðinni.

 

Kær kveðja SÞS

 

 

Athugasemdir

[Pétur Steingríms. (IP-tala skráð) 21.6.2010 kl. 17:25]

Sæll SImmi.

Ég vann á Tanganum hjá Reyni í nokkurn tíma eftir gos og þá sem sendill, ók um á gráu "rúgbrauði" eins og greifi. Einnig vann þá á Tanganum  tengdapabbi hans,  hann Tommi í "Framtíð" eða hét búðin hans það ekki og hann kallaður Tommi í Framtíð, er það ekki rétt hjá mér ???? Ég á ekkert nema góðar minningar frá þessum tíma, Reynir var frábær vinnuveitandi og Tommi gamli yndislegur karl, báðir voru þeir  ljúfir og góðir. Þetta var rétt áður en ég byrjaði sem háseti á Herjólfi.

Kveðja.

Pétur

[Sigmar Þór Sveinbjörnsson, 21.6.2010 kl. 20:09]

Heill og sæll Pétur og þakka þér þessa athugasemd. Jú það er rétt hjá þér að Tommi var kenndur við búðina sína Framtíð ef ég man rétt, í minningunni tengi ég alltaf verslunina Framtíð við Jólin, en í vesturendanum á versluninni voru seld sérstaklega falleg leikföng. það er gaman að minnast þessara manna, alla vega hef ég gaman að því að blogga um þá menn sem mér eru minnistæðir af öllu góðu. Eins og þú veist nota ég mikið af mínum tíma í að grúska í gömlum blöðum og bókum frá Eyjum og þá koma upp í hugann þessir menn sem maður átti samskipti við vegna vinnu minnar. Reynir á Tanganum er einn af þeim sem er mér minnistæður.

kær kveðja