Gömul þjóðhátíðarlög gullmolar

Gömul Þjóðhátíðarlög Eyjamanna eru hreinir gullmolar.

Úr þjóðhátíðarblaði 1962 .

  Fyrir austan mána. 

Er vetrarnóttin hjúpar hauður

í húmsins dökka töfralín

og báran smá í hálfum hljóiðum

við hamra þylur kvæðin sín.

Á vængjum drauma sálir svífa

frá sorg, er dagsins gleði fól

um óravegu ævintýra

fyrir austan mána og vestan sól.

 

Þótt örlög skilji okkar leiðir

í örmum drauma hjörtun seiðir

ástin heit, sem fjötra alla brýtur

aftur tendrast von, er sárast kól.

Við stjörnu hafsins ystu ósa

í undraveldi norðurljósa

glöð við njótum eilífs ástaryndis

fyrir austan mána og vestan sól.

 Loftur Guðmundsson

Lag Oddgeir Kristjánsson  

   

           Glóðir 

Um Dalinn læðast hægt dimmir skuggar nætur

og dapurt niðar í sæ við klettarætur.

Ég sit og stari í bálsins gullnu glóðir

og gleymdar minningar vakna mér í sál.

Hér undi ég forðum í glaum með glöðum drengjum,

þá glumdi loftið með hljóm frá villtum strengjum.

Nú sveipa klettana húmsins skuggar hljóðir

og hryggur ég stari einn í kulnað bál.

 

Þegar Dalinn sveipa húmtjöld hljóð,

horfi ég í bálsins fölvu glóð,

stari og raula gamalt lítið ljóð,

ljóð, sem gleymt er flestum hjá.

Við hvern orð og óm er minning fest,

atvik, sem mig glöddu dýpst og best.

Allt það, sem ég ann og sakna mest

ómar þessir skína frá.

 

 Loftur Guðmundsson

Lag Oddgeir Kristjánsson

Athugasemdir

[Guðrún María Óskarsdóttir., 8.2.2010 kl. 00:15]

Sæll Sigmar.

Já þetta eru gullperlur úr Eyjum, náði í geisladísk í fyrra með sextett Ólafs Gauks, með lögum Oddgeirs. Alveg yndislegt.

kv.Guðrún María.

[Sigmar Þór Sveinbjörnsson, 10.2.2010 kl. 21:22]

Heil og sæl Guðrun María og takk fyrir innlitið, já þessi diskur með hljómsveit Ólafs Gauks er með þeim bestu.

kær kveðja