Bergmálar í hamrahöllum háum

  

Edda Sigurðardóttir

 Gerði texta og lag.

Tekið úr Þjóðhátíðarblaði Þórs frá 1984

 Ágústnótt í fjallasal. 

 Þegar sunna signir sker og sund

og eyland okkar grænum möttli skartar.

Við okkar eigum saman endurfund

í dal sem geymir minningarnar bjartar.

 

Ó ágústnótt nú skarlatfeldi skartar

ágústnótt í fögrum fjallasal.

Roða slær á hamraborgir svartar

ævintýranótt í Herjólfsdal.

 

Bergmálar í hamrahöllum háum

hátt við kveðum þjóðhátíðarbrag.

Bergþursans í sínu veldi sáum

sprota sínum sveifla um sólarlag.

 

Sumargolan leikur létt við vanga

vitjar þín og græðir hjartasár.

Á meðan aldan kyssir kletta og dranga

lofa ég að koma næsta ár.

 

Þegar sunna signir sker og sund

og eyland okkar grænum möttli skartar.

Við okkar eigum saman endurfund

í dal sem geymir minningarnar bjartar.

 

 

   Hlustaðu. 

Hlustaðu vinur er húmar að nótt

og hulinn er dalur í töfranna móðu.

Að aldan við klappirnar kvíslar svo hljótt

hugljúfum orðum um eyjuna góðu.

 

Er sólin sest þá roðnar allt í kring

og kristallar á eyjasundi titra.

Særinn lokar smaragðsgrænum hring

og demanturinn aftur nær að glitra.

 

Sterkur stendur vörð um sker og sund

Heimaklettur grænum feldi skartar.

Golan leikur létt um ljúfa lund

og leikur létt á streng í mínu hjarta.

 

Hlustaðu á það vinur er húmtjald fellur á

Og heimabyggð föstum svefni sefur.

Þá berst til okkar söngur hamraklettum frá

og sungið er um allt, sem eyjan gefur.

 

Er sólin sest þá roðnar allt í kring

og kristallar á eyjasundi titra.

Særinn lokar smaragðsgrænum hring

og demanturinn aftur nær að glitra.

 Texti Edda SigurðardóttirLag Edda Sigurðardóttir.